معظم البنات بتقوم بـ إزالة المكياج بالمناديل المبللة "Wipes"، وعندهم اعتقاد أنها أحسن وسيلة لتنظيف البشرة والتخلص من المكياج، ولكن الاعتقاد ده خاطئ تماماً. ويمكن يكون سبب اعتماد البنات على المناديل المبللة هو عدم تجربة استخدام مزيلات المكياج، أو اختيار أنواع من المزيلات غير مناسبة لطبيعة البشرة أو طبيعة الميكاج اللي بيتم إزالته، وبالتالي حصل أضرار كبيرة للبشرة بعد الاستخدام. المناديل المبللة مش أفضل وسيلة لإزالة المكياج، بل بالعكس بتسبب أضرار ومشاكل كتيرة على البشرة، وخصوصاً مع عدم استخدام مرطبات للبشرة.
ودي 6 أسباب هتخليكي تتوقفي عن استخدام المناديل المبللة في إزالة المكياج
1- المناديل المبللة مش بتنظف البشرة على الإطلاق، والأخطر أنها بتنشر الملوثات والأتربة وآثار المكياج على كل أجزاء الوجه، بدل ما كانت متركزة في منطقة معينة، وبالتالي بتتكون طبقة جديدة من بقايا المكياج والأتربة فوق الطبقة الدهنية، وده يؤدي إلى سد المسام، وظهور الحبوب والبثور بكثافة. 2- المناديل المبللة مش بتزيل كل آثار الميكاج من على البشرة، وبتسيب بعض الآثار والرواسب اللي بتسبب غلق المسام. 3- الاستخدام الدائم للمناديل المبللة بيؤدي إلى تهيج البشرة، وظهور حب الشباب أو البثور اللي بتعكر صفو الوجه، وبتأثر بشكل كبير على جماله. 4- السائل الموجود في المناديل المبللة ممكن يكون غير مناسب لنوع بشرتك، وده بيسبب لك مشاكل كتير في وجهك، ومن أهمها الظهور المبكر للتجاعيد، واللي بتخليكي تظهري أكبر بكتير من عمرك الحقيقي. 5- المناديل المبللة بتكون منقوعة في الكحول، وطبعاً الكحول له تأثيرات وأضرار كتير وخصوصاً على البشرة الجافة، لأن الكحول بيؤدي إلى جفاف البشرة، وكمان بيوقف مفعول مرطبات البشرة. 6- المناديل المبللة غير مناسبة لطبيعة الماسكرا والآي شادو، وبالتالي لما بتستخدميها في إزالتهما بتسبب تهيج للجلد حول العين، وبيحصل احمرار وتورم، وممكن تظهر تجاعيد مبكرة وخطوط دقيقة حول العين، وكمان ممكن تسبب ظهور بثور أسفل الجلد وهالات سوداء حول العين. ولو كنتي مضطرة أنك تستخدمي المناديل المبللة في إزالة المكياج، ضروري جداً أنك تغسلي وجهك بمياه فاترة عشان تزيلي بقايا المكياج منه تماماً. https://www.youtube.com/watch?v=VoAPVYmc3bA واستخدمي أكتر من منديل، ومتستخدميش منديل واحد بس في إزالة الميكاج من الوجه كله، عشان البكتيريا والملوثات لا تنتشر في كل أجزاء الوجه، وعشان كمان بقايا المكياج لا تنتقل في كل المناطق. لازم تتأكدي من أن المناديل المبللة اللي بتستخدميها خالية تماماً من الكحول، وكمان لازم تكون مناسبة لنوع بشرتك.
